قصة معبرة للمغاربة فقط"علامات الساعة"

كيفاش_تخدم_ونتا_مزال_كتقرأ
(باغي غير نتقاسم معاكم جزء صغير و مشي من اجل التفشخر )
السلام عليكم ورحمة الله , معاكم يوسف من مواليد 1998 جيت نحكي ليكم تجريبتي مع الخدمة وخا تشوف هذا العمر و تقول هذا مزال صغير لكن قرأ باش تفهم المهم أنا شاب مغريبي أول خدمة خدمتها في حياتي هي في المحل خاص بالملابس التقليدية و لي كانت تجربة لي معمرها تنسى ليا في حياتي مع أنني كنت كنقرأ في السنة الأولى في الثانوية إلا أنه كنت كنخدم في الصيف لمدة ثلاث سنوات . المهم هذا الخدمة خدمت ب 600 درهم للشهر في ظروف قاصحة شويا حيث الخدمة كانت فيها ساعات طويلة أكثر من 14 ساعة مكنتش كنشوف مالين الدار غير عند الوجبات  ديال الغذاء و العشاء المهم كنت كنخدم الأيام ديال الأسبوع كلها مع أنه في داك السن مكانش عليا نخدم إلا أنه مالين الدار قالوا ليا لي دخلات للرأس تنفع المهم مارست التجارة و كان مول المحال ثايق فيا بمعنى يخلي ليا المحل و يمشي يقضى الأغراض ديالوا وأنا نبيع ليه معمرنى هزيت ليه درهم واحد في الصندوق حيث عنصر الثقة صعيب تشدوا من عند شي واحد . من بعد ما شديت البكالوريا في شعبة العلوم الحياة و الأرض قررت نغير المسار العلمي للمسار ديال الاقتصاد المهم مع أن الجامعة معروفة بالفراغ ديال الوقت لي كنعرفوه كاين فيها , قررت نتعلم شي حاجة جديدة ومع أنني مهووس بشي حاجة سميتها الحاسوب و المعلوميات كنت كنقرأ من عندي كنت كنقرأ هنا  و هنا و دخلت لمجال الدعاية و الإشهار المهم كنت مزيان في هذا المجال وخدمت مع واحد مول المكتبة في الصيف ب 1000 درهم ( شويا بشويا كيطلع الثمن ديال الخدمة ديالي ههه ) المهم كنت تا هي أجمل فترة لي دامت شهرين متتابعين في ظروف لي مزية ب حكم صاحب المحل مزيرة شويا و كيبغي يدير فيها عارف كلشي المهم كنت كنخدم من 9 ل 1 ونص  ومن 3 ل 10 ديال الليل كنت كندير كلشي و خدامة معيا بنت المهم كنت كنقاد الحواسيب كنت كندخل الواتساب و الفيسبوك للهاتف كنفورماطي الهاتف كنكتب في الحاسوب كندير الاشهار للمكتبة عبر الفيسبوك كنبيع كندير الفوطوكوبي ,,,,, المهم كنت أنا هو حمار الطحونة كنت كنتسخر ومعمرني قلت لا يوسف هذي مشي بلاصتك العكس قلت كلشي زوين وكلشي كينفع من بعد هذا شهرين لي دازوا و إلى كنحمد الله عليهم وخا المعانات مع صاحب المحل و مابغيتش ندخل في هذا الموضوع حيث مشي موضوع ديالنا , المهم من بعد بديت قرايتي في العام الثاني في الجامعة تخصص إقتصاد المهم مع واحد السيد في المدينة كيدير السوايع و  بحكم أنني عندي مع شويت الاشهار و الدعاية و دكشي قتارح عليا هذا لي كيدير السوايع للطلبة نقاد ليه شي إشهارات قلت مزيانة هذا الفكرة خدمت معاه و في الاخير ملى كملت ليه الخدمة وكلشي مزيان قال ليا شحال عندي في المجموع قلت ليه لا ره مشي مشكل و مابيناتنش قتارح عليا نجي نبقى ندير عندوا السوايع لكن من بعد ما يرسل ليا راسل باش نلتحق بيهم في المؤسسة المهم سي يوسف كيتسنى اليوم غذا بعدوا بعد بعدوا صافى طلقت راسي و متسوقتش ليه ( أصلا معمرني درت السوايع و مكنحملهمش نهائيا ) من بعد عيط ليا واحد مدير ديال مؤسسة خاصة بالسوايع  ندير ليهم الاشهار في الفيسبوك ونصاوب ليهم منشورات المهم دار معايا 500 درهم للشهر قلت مشي مشكل فيها خير لكن الشئ لي معجبنيش هو أنه باغي يخدم بيا جوج خدمات في دقة وحدة دار معايا نقاد ليه الاشهار و بالاضافة أنه باغي يديري في الاستقبال من 7 ل 9 ديال الليل المهم دوزت معه أسبوع معجبنيش دكشي وأنا نقول ليه الله يعاونك .
من بعد 3 اشهر عيط عليا واحد مدير ديال وكالة خاصة بالإشهار في المدينة نخدم معاه ب 1500 درهم ( شفتوا شويا بشويا كنطلع في المستوى ديال الثمن )  المهم بديت معه النهار الاول قديت خدمة لواحد الثانوية لي هي عبارة على يافطة ( لي هي لافتة إشهارية كبيرة )  و عجباتوا الخدمة من بعد النهار الثاني خدمت لمرجان واحد جوج اليافطة فيها 5 متر على 5 متر , من بعد هذا يومين جاني عرض عمل من واحد السيد عندوا شركة خاصة ب 1500 درهم باش نجلس ليه في المكتب و نسير ليه المكتب بحكم هو مكيجلس فيه . و في الاخير ختاريت نجلس في المكتب بحكم أنني خصنى نقرأ ونخدم و دارها معايا مول الشركة نخدم ونقرأ و دابا خدام مزيان و كلشي هدشي بلا سيرة داتي بلا سطاج و بلا باك صاحبي شوف خصك غير تخدم على راسك فين ما كان  .نصيحتى للشباب هو عندكم الأنترنيت لي فيه كلشي كنصحكم تقرأوا فيه والله ت تبدل حياتكم للأفضل , خدم في كلشي الخدمة مشي عيب العيب هو تسنى الخدمة  تجيك . مافيها عيب تخدم ب 600 درهم وخا بسيطة و مدايرة والوا لكن التجريبة ديالك هي لي كتحدد شخصيتك . سمحوا ليا إلا طولت عليكم و الله يرزقنا و إياكم كل خير يارب و كل التوفيق لينا وليكم