رسالة للمقاولين الشباب

رسالة للمقاولين الشباب لي بحالي الجزء التاني :                                                                                بعد مدرت داك المشروع ديال Gear vr  و نجح ماشي وليت لباس عليا ولكن كنت كنربح من 300 حتى 500 درهم في نهار او بالأحرى في العشية حتى الليل او نرجعو في الطرام اللخر ديال عين الدياب، هاد المشروع هو لي زعمني باش نزعم او نتيق في المقاولة حيت كنت كنفرح فاش كنشوف الناس مستمتعين عندي او كنزيد نفرح كثر من كان جيبي كيعمر مع الفكرة لي من قلتها لدار ضحكو عليا من بعد ولات الوليدة كتقول ليهوم خليو عادل ينعس راه بيت خدام مسكين او دارو ليا قيمة ههه او بالأحرى للفلوس حيت حنا ماديين كنتيقو في الفلوس مكنتيقوش في الفكرة .

لوهيم سالا الصيف او المشروع كيبقى موسمي واخا باغي نطورو من بعد او عندي افكار زوينين فيه، بدات القرايا فلافاك عشت ملك داك الصيف ههه دخلت للجيم لي بغيت او عونت الدار و داكشي لموهيم سلاو ليا الفلوس " كيف قال دوستويوفسكي في الرواية ديال المقامر من كيسليو ليك الفلوس عاد عقلك كيحس بالخطر او كيولي يفكر في الحلول" .

فكرت مع صحابي اننا نديرو دروس الدعم او كرينا مدراسة او خدمنا فيها المشكل انه كان ناقصنا التجربة او خاص الوقت باش تجيب دراري بزاف هادشي مكانش كافي بديت كندير الدروس الخصوصية ولكن كانت كتسخسني حيت انا معنديش الكاريزمة ديال استاذ او التعليم ممعطيش لكولشي ، لموهيم بدلت لحرفة درت مع واحد الصديق ديالي باج في الفيسبوك او بدينا كنجيبو السلعة ديال اللوازم الهواتف او داكشي من غراج علال او درب غلف او كنبيعوها هادشي زوين ولكن مقنعنيش هادشي كولشي يقدر يديرو او مكيدخلش الفلوس من الدقة اللولة .

لموهيم حيت قبل منعس كنجبد شي كتاب نقراه واحد النهار طاحت عليا الفكرة أنني ندير كتوبا صغار بحال أكسيسوار او يكونو ديال اي كتاب بغيتي فعلا بديت كنقلب على المادة لي غنخدم بيها او كندير نمودج اولي لي كان كيضحك ولكن بقيت كل نهار كنبحث او نقلب حتى لقيت نوع لورق لي غنخدم بيه او كان خاصني نتعلم الفوتوشو او إلستراتور لموهيم هادشي كامل بقيت فيه شي شهرين عاد خرجت الفكرة لأرض الواقع لي زدت عليها كيسان او نوت بوك او فواصل الكتب لي كونت كنصيبهوم باش نزوق المنتوج ديالي او يكون داكشي متنوع .

لموهيم هاد الفكرة نجحات او كان خاصني كوميرصيال مزيان ديت معايا واحد الصديقة كوميرصيال لمعرض الكتاب نقلبو على شي دار النشر تبنى الفكرة ديالي حتى لقيت واحد دار النشر في فرانسا لي شديت من عندو كوموند كبيرا او خدمت معايا جوج دراري باش نعطيه الكوموند في الوقت هنا تعلمت تسيير الفريق ،

من بعد هاد المشروع ماسالا او خديت الإجازة او مبغيتش نكمل فالماستر خديت قرار انني نكمل فالمقاولة او نطور راسي كثر او ندير المواكبة لراسي في التسيير و المحاسبة او داكشي ، لموهيم هنا قولت مع راسي  لواحد دار 24 عام خاصو يفكر فشي مشروع كبيير او يبقى ماشي شيحاجة موسمية لموهيم تبعت مبدأ "تبع حرفت بوك ليغلبوك" من الصغر كونت كنبريكولي مع الأب ديالي في الكهرباء و البلومبي او مع عمامي في الصباغة هادشي علاش فكرت انني ندير مقاولة مع الأب ديالي ولكن القيمة المضافة لي غنعطي انني غادي ندمج مابين الخبرة ديال الواليد او لمعلمية لي معاه او الإبداع ديال الدراري لي معايا باش نعطيو لناس شيحاجة زوينة و متقونة او مبدعة او التمن يكون مناسب باش نديرو كليان ديالنا .

حاليا صيبت المقاولة او خدام على الإشهار او الجانب الإداري باش نبدا فيها او كنتمنى تنجح .
اعتذر انني طولت .
منقول من فيسبوك